UDC passport : usuario

DESCRICIÓN DO SERVIZO

Proporciónase acceso ao xestor de contidos corporativo da Universidade (OpenCms) para a creación de portais web de órganos ou entidades pertencentes á Universidade da Coruña. 

A publicación de contidos no dito xestor non require de coñecementos técnicos en html, ftp, css etc. A subida de contidos realízase a través do navegador utilizando a ferramenta de xestión de contidos que inclúe o OpenCms corporativo.

Os modelos para a publicación de contidos están predefinidos seguindo a imaxe corporativa da Universidade. Estes modelos non poderán ser modificados.

QUE NON INCLÚE ESTE SERVIZO

Soporte a portais web desenvolvidos fóra do xestor de contidos corporativo (OpenCms) da Universidade da Coruña.

Se desexa instalar o seu propio xestor de contidos para dar aloxamento á súa web, consulte o servizo de "Hosting Virtual".

QUEN PODE FACER USO DESTE SERVIZO?

Poderá solicitar aloxamento web calquera PDI ou PAS pertencente á Universidade da Coruña que sexa ademais responsable dalgún dos seguintes órganos ou entidades para o que solicita o aloxamento web:

• Centro
• Departamento
• Instituto universitario
• Servizo administrativo
• Grupo de investigación
• Organización sindical e agrupación electoral
• Congresos e xornadas de divulgación que organice a UDC
• Revistas científicas ou académicas editadas pola UDC

Calquera órgano ou entidade non incluído na listaxe anterior requirirá autorización previa do reitor.

CONDICIÓNS DO SERVIZO

O Servizo de Informática e Comunicacións (SIC) proporcionará acceso ao xestor OpenCms da Universidade, ofrecendo ao órgano ou entidade un espazo no que aloxar a súa web. Os enderezos de acceso público da web serán https://www.udc.es/siglas e https://www.udc.gal/siglas, onde "siglas" pode ser as siglas ou un nome curto (sen espacios ou símbolos) que identifique o órgano ou a entidade.

A edición das páxinas e o mantemento da información do portal debe ser realizada polo responsable da web ou polas persoas que designe baixo a súa tutela, empregando a ferramenta de xestión de contidos que inclúe o OpenCms da Universidade. Para o desenvolvemento inicial da web, o SIC podería colaborar desenvolvendo a páxina de inicio do portal e ata 5 páxinas interiores a modo de exemplo.

A persoa responsable do órgano ou entidade ten a total responsable dos contidos publicados na súa web, da información almacenada ou transmitida, das súas explotacións, dos enlaces de hipertexto, das reivindicacións de terceiros e das accións legais que poidan desencadear. O SIC non será responsable dos danos e prexuízos de calquera natureza que se puidesen causar a un terceiro como consecuencia da utilización indebida ou ilexítima deste servizo.

O SIC fará todo o razoablemente posible para manter a operatividade ininterrompida dos seus servizos, de acordo cos circuítos previstos regularmente de mantemento de servidores e redes. No entanto, posto que existen moitos sucesos e circunstancias que se encontran máis alá do control do SIC, o SIC non responde do retraso, perda de datos, deficiencias na conexión, conexión lenta, ou calquera outro suceso similar producido por causas alleas ao SIC.

O SIC poderá limitar ou denegar discrecionalmente o acceso aos seus servidores se ao seu xuízo as ditas limitacións ou denegacións son necesarias para garantir a seguridade da rede, a integridade da estrutura da rede ou para previr danos na rede, o software ou dos datos almacenados nos servidores do SIC.

O SIC poderá, sin previo aviso, interromper temporalmente ou incluso cancelar definitivamente este servizo para un órgano ou entidade no caso de incumprimento das condicións de uso.

O espazo ocupado polos contidos web está limitado a un total de medio Xigabyte e o tamaño máximo de cada arquivo individual non superará os dous MegaBytes. O SIC poderá poñer controis no servidor que verifiquen o cumprimento destas limitacións.

Este servizo non ten custo para o órgano ou entidade solicitante.

CONDICIÓNS DE USO

Os contido publicado na web estará de acordo coas funcións establecidas para a Universidade da Coruña nos seus Estatutos e só poderá incluír información relacionada coa actividade específica do órgano ou unidade responsable. O uso do servizo deberá realizarse conforme as condicións pactadas, á lexislación vixente e á boa fe. En ningún caso se poderán publicar contidos que poñan en risco a boa imaxe da Universidade.

A información publicada, así coma as ligazóns incluidas, deberá estar actualizada e non poderá conter información obsoleta ou errónea.

O aloxamento utilizarase única e exclusivamente para albergar os contidos publicados na web. En ningún caso se usará como disco duro ou almacén de datos.

En ningún caso se usará o servizo de aloxamento web coas seguintes finalidades:

• Incorrer en actividades ilícitas ou ilegais de calquera tipo e, particularmente, difundir contidos ou propaganda de carácter racista, xenófobo, pornográfico, sexista, de apoloxía do terrorismo ou atentatorio contra os dereitos humanos, ou actuar en prexuízo dos dereitos á intimidade, ao honor, á propia imaxe ou contra a dignidade das persoas.
• Difundir manifestacións ou referencias falsas, incorrectas ou inexactas sobre os servizos da Universidade da Coruña.
• Danar os sistemas físicos e lóxicos da Universidade da Coruña, dos seus provedores ou de terceiras persoas.
• Introducir ou difundir na rede virus informáticos ou outros sistemas físicos ou lóxicos que sexan susceptibles de provocar os danos anteriormente citados. Absterse de calquera práctica de comunicación masiva ou calquera exercicio ou uso de recursos de sistema que poña en perigo a seguridade e estabilidade do sistema e/ou dos usuarios.

Os contidos publicados deben ser accesibles para garantir os dereitos das persoas con discapacidade e a súa inclusión social.

Os contidos deberán respectar os dereitos de autor e da propiedade intelectual, segundo a lexislación vixente.

Queda prohibida a recollida, publicación e/ou utilización de datos persoais sen o consentimento expreso ou transgredindo o disposto na Lei orgánica 15/1999, de 13 de decembro, de protección de datos de carácter persoal e o Regulamento (UE) 2016/679 do Parlamento Europeo e do consello de 27 de abril de 2016 relativo á protección das persoas físicas no que respecta ao tratamento de datos persoais e á libre circulación destes datos.

Queda expresamente prohibida a inclusión de contidos con publicidade comercial, así como calquera tipo de actividade lucrativa allea ás propias funcións do órgano ou entidade da Universidade.

HISTORIAL DE ACTUALIZACIÓNS

• 11 de setembro de 2019 - Chinchetas para fixar novas na primeira posición dunha listaxe

• 10 de xuño de 2018 - Lanzamento da nova web corporativa